امصيب

قال العطية قيل في بدعه امصيب

لا من خطى غيره بمرماه ضربه

له سايلٍ جا له وهو رده يجيب

يعطيه ما منه عصى دوم سلبه

من بعد ما طرش عليه المناديب

واليا بعد كنه شهد معه قربه

اسمي ليا من خط بين المكاتيب

كنه ليا منه قري معه طربه

الزير سالم ثار من ذبحة كليب

تغلب شغلها مع بكر طول حربه

ذبيان ويا عبس ابطت مناشيب

معها فنى عنتر عدوه برعبه

نبذة عن التاريخ بالحق ما هيب

في أمرها لا من روت مثل لعبه

هذا وانا ماني امجهز بترتيب

لكن سردي عبرةٍ دون حسبه

يا بو هلا حييت معها تراحيب

دوك القصيد بعلم قبله وعقبه

من راس به يحتاس مثل الدواليب

بالبحر هاجوسٍ له اثنيت ركبه

المجد هو دايم ترى له مكاسيب

سهله مهب باي حال يشبه لصعبه

واللي حضر له غير عن منهو يغيب

دارٍ ولدها عاش دايم بغربه

مدين ترى دايم بها صايب شعيب

ولا درت به كل ما قال خطبه

وقتي انا به خضت كل التجاريب

واجري معي من كل له كبد رطبه

ما اشغلت روحي في غرام الرعابيب

ايضا ولا ضيعت عمري بنكبة

الحر يدمي لا ضرب بالمخاليب

والريش مذبوحٍ حواليه خربه

والشمس لو تقدح تحتها مشاهيب

النور منها فاق لا قيس نسبه

والضلع يرسي لو تحوفه لواهيب

سافيه كنه هو تلون بعشبه

والقرم منزاله بروس المراقيب

لو كان ما له أي منصب ورتبه

ما الله جعلني عبد عنده معازيب

حر بحياته ما خشى غير ربه

أجناس تتفرق على العيب والطيب

كلٍ ترى معروف جرحه وطبه

من عز نفسه وإن بها هي عذاريب

كنه بنى له بيت من تحت قبه

وأنا خليفه باخصٍ بالمواجيب

لا تاه كل ماشي وضيع بدربه

لا ما اعلم الخافي ولا اعلم الغيب

لكن راي الرجل من فكر لبه

شبابي اللي ما تهنى مع الشيب

كنه لبن لا ساح من فتح جربه

ترى الحصاني وإن تشابه مع الذيب

نابٍ فرق به فرس ليثه وكلبه

ولكل دينٍ له فتاوي مذاهيب

ولكل فصلٍ في السنه له مهبه

الحق يدمغ كل شكٍ وكل ريب

والزور يطفي كل علمٍ تشبه

والصدق لو تكثر وراه الاكاذيب

قمح فرقت باللون لا نثر حبه

حتى ايش يا دنيا كثيرة تعاجيب

ماي البحر ما لذ طعمه بشربه

تمت ولا هي وافيه بالمطاليب

لكنها بين الجزيلات عذبه