بعض الخلايق

يا هيه ما لي على بعض الخلايق حقوق

والله هو اللي يفرق كل طريق وطريق

كم شخص عايش بهالدنيا وحظه يفوق

حظ الذي هو بغى مثله لو أنه رفيق

لكن سلامي على صدرٍ حوى له خفوق

ما به من الخوف شعلة من لهبها حريق

الوقت جاحد وهو ما له ضميرٍ شفوق

والناس مثله وهذا الحق علمٍ وثيق

به واحدٍ قد قنى له بكرةٍ هي سبوق

ولا تنومس بنوماسٍ يسر الصديق

ما كل راعي هجن هجنه تسمى بنوق

بعض الركايب سببها دايماً مستضيق

من كان راسه تحت اليوم هو صار فوق

حتى ولو كان وسط المعمعة كالغريق

وخلاف ذا يا نديمي كان يبست حلوق

فانا لساني لك الله منه ما جف ريق

ولا التجارة لها ناسٍ وهي وسط سوق

وانا مع الجيش ضابط مهنته كالفريق

واللي بقلبي بقى لو ما بقى له يتوق

اسمه ليا من ذكرته كن انا به شريق

كل ما بعد لا قرب يبعد وقربه بشوق

منه بقلبي وجد جرحٍ غدى هو عميق

والود كنه انا به بين طوقٍ وطوق

لانه قديمٍ غدى من بعدها كالعريق

كن صابني بالمحبه من سبايبه عوق

ازريت انا به كما اللي قد بقى به عليق

تميت قافٍ بديته كنما هو دفوق

سقيٍ رواني وله بي من زفير وشهيق