في شروق وغروب

بن عطيه يقوله من هجوسٍ طرت له في شروق وغروب

بعدما عاد رايق من مزاجٍ تعكر لين عود وطاب

قاله اللي مقاله يشرح البال بوحه كل ما جا وجوب

وأرتكى له وناله وأستوى له مجاله في شبابه وشاب

عاذلي كف عذلي للبداية نهاية ما بها من عيوب

حيثه أسمي ورسمي لاح كنه جفافٍ قد سقاه السراب

ليل ياللي سهرته والورى به نيامٍ فيه هبت هبوب

غير ما هو طرالي واختلف معه حالي لين روح وغاب

ليت كل ما توافق هو توافق بليا أي خلاف ونشوب

ما خذا الحق واحد عارف الحق لكن هو تحفظ وجاب

والسحاب ان تعلى كالستاير تدلى لين ظلل دروب

حولها بان ماشي واليٍ له حواشي فاتحٍ دوم باب

كنه الثلج عود لا تكون تزود بعدها هو يذوب

كالبنا لا تشيد بعدما هو تحيد ثم غدى هو خراب

كم علي من زماني قد غشاني ولاني منطرح للكروب

عزمي اللي بهمي سار به بين دمي باس عند الصعاب

هو خليفه لحاله دون عمه وخاله بارزٍ للخطوب

غير درعٍ وخوذه ما لبس في الحوادث لجلها من ثياب

لا طفح سيل جارف كنما عاد نبعه بعد سقيه نضوب

مثل قيلٍ بديته ثم نهيته وانا اللي مع سؤاله جواب